കുവൈറ്റില്‍ നിയമം ലംഘിച്ച് താമസിച്ച നിരവധി പ്രവാസികള്‍ അറസ്റ്റില്‍
പൊതുമാപ്പ് അവസാനിച്ചിട്ടും രാജ്യത്ത് തങ്ങുന്ന നിയമ വിരുദ്ധ താമസക്കാര്‍ക്കെതിരേ ശക്തമായ നടപടികളുമായി മുന്നോട്ടുപോവാനാണ് അധികൃതരുടെ തീരുമാനം
കുവൈറ്റില്‍ താമസ, തൊഴില്‍ നിയമങ്ങള്‍ ലംഘിച്ച് രാജ്യത്ത് തങ്ങുന്നവരെ കണ്ടെത്തുന്നതിനായി ആഭ്യന്തരമന്ത്രാലയം ആരംഭിച്ച കാമ്പയിന്‍ തുടരുന്നു. ശനിയാഴ്ച ഫര്‍വാനിയ ഗവര്‍ണറേറ്റിലെ ആറു പ്രവാസിക കേന്ദ്രങ്ങളില്‍ നടന്ന പരിശോധനയില്‍ 200ലേറെ വിദേശികള്‍ പിടിയിലായതായി അല്‍ റായ് ദിനപ്പത്രം റിപ്പോര്‍ട്ട് ചെയ്തു.
ജലീബ് അല്‍ ശുയൂഖ്, ഫര്‍വാനിയ, ഖൈത്താന്‍, അന്‍ദലൂസ്, റാബിയ, അര്‍ദിയ വ്യവസായ മേഖല എന്നിവിടങ്ങളിലാണ് ശനിയാഴ്ച സുരക്ഷ പരിശോധന നടന്നത്. ആഭ്യന്തര മന്ത്രാലയത്തിലെ പൊതു സുരക്ഷാകാര്യ അസിസ്റ്റന്റ് അണ്ടര്‍ സെക്രട്ടറി മേജര്‍ ജനറല്‍ ഫര്‍റാജ് അല്‍ സൂബിയുടെ മേല്‍നോട്ടത്തില്‍ 170ഓളം ഉദ്യോഗസ്ഥര്‍ റെയ്ഡില്‍ പങ്കെടുത്തു.
പൊലീസ് സേനക്ക് പുറമെ മാന്‍ പവര്‍ അതോറിറ്റി, മുനിസിപ്പാലിറ്റി മന്ത്രാലയം എന്നിവയിലെ ഉദ്യോഗസ്ഥരും പരിശോധനയുടെ ഭാഗമായി. ഡ്രോണ്‍ ഉപയോഗിച്ച് നിരീക്ഷണം നടത്തിയ ശേഷമാണു പരിശോധന ആരംഭിച്ചത്.
വിസ കാലാവധി കഴിഞ്ഞവര്‍, തൊഴിലുകളില്‍ നിന്ന് പിരിച്ചുവിടപ്പെട്ടവര്‍, മറ്റു താമസരേഖകള്‍ ഇല്ലാത്തവര്‍, സ്പോണ്‍സര്‍മാരില്‍ നിന്ന് ഒളിച്ചോടി പുറത്ത് ജോലിയെടുക്കുന്ന ഗാര്‍ഹിക തൊഴിലാളികള്‍, ചീട്ടുകളി സംഘങ്ങള്‍, അനധികൃത വഴിവാണിഭക്കാര്‍ എന്നിവരാണ് പിടിയിലായത്.
നിയമ വിരുദ്ധ താമസക്കാര്‍ക്ക് ഫൈന്‍ അടച്ച് താമസം ക്രമവല്‍ക്കരിക്കുകയോ കുവൈറ്റില്‍ നിന്ന് പുറത്തുപോവുകയോ ചെയ്യാനുള്ള അവസരവുമായി നിരവധി തവണ പൊതുമാപ്പ് ഏര്‍പ്പെടുത്തിയിരുന്നുവെങ്കിലും അവയൊന്നും പ്രയോജനപ്പെടുത്താതെ കുവൈറ്റില്‍ തന്നെ കഴിയുന്ന അനധികൃത താമസക്കാരെയാണ് പരിശോധനകളിലൂടെ പിടികൂടുന്നത്.
കൊവിഡ് പശ്ചാത്തലത്തില്‍ വ്യോമഗതാഗതം തടസ്സപ്പെട്ടത് കാരണം പല തവണകളായി നീട്ടിവച്ച് ഒരു വര്‍ഷത്തിലേറെ നീണ്ട പൊതുമാപ്പ് കാലാവധി അവസാനിച്ചതിനെ തുടര്‍ന്നാണ് നടപടി. പൊതുമാപ്പ് അവസാനിച്ചിട്ടും രാജ്യത്ത് തങ്ങുന്ന നിയമ വിരുദ്ധ താമസക്കാര്‍ക്കെതിരേ ശക്തമായ നടപടികളുമായി മുന്നോട്ടുപോവാനാണ് അധികൃതരുടെ തീരുമാനം. ഇത്തരക്കാര്‍ അനധികൃത ലഹരി വ്യാപാരത്തിലും ലൈംഗിക തൊഴിലിലും ഏര്‍പ്പെടുന്നതായും പോലിസ് വ്യക്തമാക്കി.
ഇങ്ങനെ പിടികൂടപ്പെടുന്നവരെ എന്നെന്നേക്കുമായി നാടുകടത്തുന്നത് ഉള്‍പ്പെടെയുള്ള നടപടികള്‍ക്ക് വിധേയരാക്കുമെന്ന് ആഭ്യന്തര മന്ത്രാലയം അറിയിച്ചു. നേരത്തേ അല്‍ അഹ്മദി മേഖലയില്‍ നടത്തിയ റെയിഡുകളില്‍ ഇരുന്നൂറോളം പേരെ പോലിസ് അറസ്റ്റ് ചെയ്തിരുന്നു.
Several expatriates have been arrested for illegally staying in Kuwait