വാഹനമോടിക്കുമ്പോൾ ഹാൻഡ്‌സ് ഫ്രീ ഉപയോഗിക്കാൻ നിയമം ഉണ്ടോ ? അജയ് ബാലചന്ദ്രൻ എഴുതുന്നു

ഡ്രൈവ് ചെയ്യുമ്പോൾ കയ്യിൽ പിടിക്കേണ്ടാത്ത (HANDS FREE) കമ്യൂണിക്കേഷൻ ഉപകരണങ്ങൾ (മൊബൈൽ ഫോൺ, സാറ്റലൈറ്റ് ഫോൺ എന്നിവയൊക്കെ ഉദാഹരണം) ഉപയോഗിക്കുന്നത് സംബന്ധിച്ച് ചില ഉദ്യോഗസ്ഥർ പറയുന്ന അവകാശവാദങ്ങളെപ്പറ്റിയും അത് സംബന്ധിച്ച് വരുന്ന പത്രവാർത്തകളെപ്പറ്റിയുമാണ് പോസ്റ്റ്.

ഞാൻ ഒരു നിയമവിദഗ്ദ്ധനല്ല. വെറും ഒരു സാധാരണക്കാരനാണ് എന്ന് ആദ്യമേ പറയട്ടെ. തെറ്റുണ്ടെങ്കിൽ തിരുത്താൻ അപേക്ഷ. നിയമം (LAW) നിർമിക്കാനുള്ള അവകാശം ഇന്ത്യൻ ഭരണഘടനയനുസരിച്ച് നിയമസഭകൾക്കും പാർലമെന്റിനുമാണ്. നിയമങ്ങൾ നടപ്പിലാക്കാനായി നിയമങ്ങളെ അടിസ്ഥാനമാക്കി ഭരണകൂടം തയ്യാറാക്കുന്നതാണ് ചട്ടങ്ങൾ (RULES). ചട്ടങ്ങൾ രൂപീകരിക്കുന്നത് നാട്ടിൽ അന്നന്ന് നിലവിലുള്ള നിയമത്തെ അടിസ്ഥാനമാക്കിയാവണം. ഒരു സമയത്ത് രാജ്യത്ത് നിലവിലുള്ള നിയമങ്ങൾക്ക് വിരുദ്ധമായ ചട്ടങ്ങൾ നിലനിൽക്കില്ല.

ഇനി വാഹനമോടിക്കുമ്പോൾ ഉള്ള മൊബൈൽ ഫോൺ ഉപയോഗത്തെപ്പറ്റി ഇന്ത്യയിൽ നിലവിലുള്ള നിയമങ്ങളെയും ചട്ടങ്ങളെപ്പറ്റിയും സംബന്ധിച്ച് ഞാൻ മനസ്സിലാക്കിയ കാര്യങ്ങൾ വിശദീകരിക്കാം. [ഉദ്യോഗസ്ഥർ എന്ത് പറഞ്ഞാലും “വ്യക്തമാക്കി“ എന്നാണ് മാധ്യമങ്ങൾ എഴുതുന്നത്. എനിക്ക് കാര്യങ്ങൾ വ്യക്തമാക്കാൻ തക്ക ശക്തിയുള്ള ഉദ്യോഗമൊന്നുമില്ല. ഞാൻ എനിക്ക് മനസ്സിലായ കാര്യങ്ങൾ എഴുതുക മാത്രമാണ്.

1. ഇന്ത്യയിലെ മോട്ടോർ വെഹിക്കിൾ ആക്റ്റ് (THE MOTOR VEHICLES ACT, 1988) ഗസറ്റ് നോട്ടിഫിക്കേഷനിലൂടെ 1989 മേയ് 22നാണ് നിലവിൽ വന്നത്.
2. ഈ ആക്റ്റനുസരിച്ച് രൂപപ്പെടുത്തിയ ചട്ടങ്ങൾ (THE CENTRAL MOTOR VEHICLES RULES, 1989) 1989 ജൂൺ 2-ന് ഗസറ്റ് വിജ്ഞാപനത്തിലൂടെ നിലവിൽ വന്നു. ഇത് നിലവിലുള്ള നിയമം അനുസരിച്ചുള്ള ചട്ടമാണ് എന്നത് ശ്രദ്ധിക്കുക. ഈ ചട്ടം നിയമത്തിന് മുകളിലല്ല.
3. ഈ നിയമത്തിലോ ചട്ടത്തിലോ മൊബൈൽ ഫോൺ സംബന്ധിച്ച് നിബന്ധനകളോ നിയന്ത്രണങ്ങളോ 1989-ൽ ഉണ്ടായിരുന്നില്ല.
4. ട്രാൻസ്പോർട്ട് വാഹനം ഡ്രൈവ് ചെയ്യുന്നതിനിടെ ശ്രദ്ധ തെറ്റുന്ന തരം പ്രവൃത്തികളിൽ ഏർപ്പെട്ടാൽ ലൈസൻസ് റദ്ദാക്കാമെന്ന് സെൻട്രൽ മോട്ടോർ വെഹിക്കിൾ റൂൾസ് ചട്ടം 21 (6) G.S.R. 933(E) ലൂടെ 1989 നവംബർ 28-ന് നിലവിൽ വരുന്ന തരത്തിൽ ഭേദഗതി ചെയ്തു. അന്നും ഡ്രൈവ് ചെയുമ്പോൾ മൊബൈൽ ഫോൺ ഉപയോഗിക്കുന്നത് ശ്രദ്ധ തിരിക്കുന്നതാണോ എന്നത് സംബന്ധിച്ചുള്ള വ്യക്തത നിയമത്തിൽ ഇല്ലായിരുന്നു. പോലീസിനും മോട്ടോർ വെഹിക്കിൾ ഉദ്യോഗസ്ഥർക്കും സ്വന്തം ഇഷ്ടപ്രകാരം മൊബൈൽ ഫോൺ ഉപയോഗം ശ്രദ്ധ തിരിക്കുന്നുണ്ടോ ഇല്ലയോ എന്ന് തീരുമാനിക്കാമായിരുന്നു. [ഇതും നിലവിലുള്ള നിയമം അനുസരിച്ചുള്ള ചട്ടമാണ് എന്നത് ശ്രദ്ധിക്കുക. ഈ ചട്ടവും നിയമത്തിന് മുകളിലല്ല.]
5. G.S.R. 221(E) പ്രകാരം 2001 മാർച്ച് 28 മുതൽ പ്രാബല്യത്തിൽ വരുന്ന തരത്തിൽ ഡ്രൈവ് ചെയ്യുമ്പോൾ മൊബൈൽ ഫോൺ ഉപയോഗിക്കുന്നത് ശിക്ഷാർഹമായ കുറ്റമാകുന്ന തരത്തിൽ സെൻട്രൽ മോട്ടോർ വെഹിക്കിൾ റൂൾസ് ഭേദഗതി ചെയ്തു. മോട്ടോർ വെഹിക്കിൾ റൂൾ സെക്ഷൻ 21 (25) അനുസരിച്ച് ഡ്രൈവ് ചെയ്യുന്നതിനിടെ മൊബൈൽ ഫോൺ ഉപയോഗിച്ചാൽ ലൈസൻസ് റദ്ദ് ചെയ്യാവുന്നതാണ് എന്നായിരുന്നു ഭേദഗതി. ഇതിലൂടെ കൂടുതൽ വ്യക്തത വന്നു എന്ന് കാണാവുന്നതാണ്. ഇതിന് ശേഷം മൊബൈൽ ഫോൺ ഉപയോഗത്തിന് ചട്ടം 21(6) ഉപയോഗിക്കേണ്ട ആവശ്യമില്ല. 21 (25) ഉപയോഗിച്ചാൽ മതി!!! [ഇതും നിലവിലുള്ള നിയമം അനുസരിച്ചുള്ള ചട്ടമാണ് എന്നത് ശ്രദ്ധിക്കുക. ഈ ചട്ടവും നിയമത്തിന് മുകളിലല്ല.
6. ഇതിനിടെ 2011-ൽ കേരള പോലീസ് ആക്റ്റ് ഭേദഗതി ചെയ്തു. ഈ നിയമത്തിലെ സെക്ഷൻ 118 (e) അനുസരിച്ച് പൊതുജനങ്ങൾക്ക് അപകടമുണ്ടാക്കുന്നതോ പൊതു സുരക്ഷ തകരാറിലാക്കുന്നതോ ആയ പ്രവൃത്തികളിൽ ഏർപ്പെടുന്നത് ശിക്ഷാർഹമായി. ഈ വകുപ്പ് മൊബൈൽ ഫോൺ ഉപയോഗിച്ചുകൊണ്ട് വാഹനമോടിക്കുന്നവർക്കെതിരേ കേസ് ചാർജ്ജ് ചെയ്യാൻ കേരള പോലീസ് ഉപയോഗിക്കുമായിരുന്നു. പക്ഷേ SANTHOSH M.J. V. STATE OF KERALA എന്ന കേസിൽ കേരള ഹൈക്കോടതിയുടെ ഡിവിഷൻ ബഞ്ച് ഈ വകുപ്പ് ഉപയോഗിച്ച് മൊബൈൽ ഫോൺ ഉപയോഗിച്ചുകൊണ്ട് വാഹനമോടിക്കുന്നവരെ ശിക്ഷിക്കാനാവില്ല എന്ന് വിധിച്ചു. അതോടെ ഈ വകുപ്പിന് ഹാൻഡ് ഹെൽഡ് മൊബൈൽ ഫോണുകളുടെയോ ഹാൻഡ്സ് ഫ്രീ മൊബൈൽ ഫോണുകളുടെയോ ഉപയോഗത്തിന്റെ കാര്യത്തിൽ ഒരു പ്രസക്തിയും ഇല്ലാതായി. ഇപ്പോഴുള്ള വിവാദത്തിൽ ഒരു ഉദ്യോഗസ്ഥരും ഈ നിയമത്തിന്റെ കാര്യം മിണ്ടുന്നില്ല എന്നത് ശ്രദ്ധിക്കുക.
7. മോട്ടോർ വെഹിക്കിൾ ആക്റ്റിലെ സെക്ഷൻ 118 പ്രകാരമുള്ള അധികാരമുപയോഗിച്ച് 2017 ജൂൺ 23-ന് കേന്ദ്രഗവണ്മെന്റ് മോട്ടോർ വെഹിക്കിൾസ് (ഡ്രൈവിങ്) റെഗുലേഷൻസ്, 2017 ഗസറ്റ് വിജ്ഞാപനത്തിലൂടെ കൊണ്ടുവന്നു. ഈ റെഗുലേഷനിലെ 37 (1) അനുസരിച്ച് ഡ്രൈവർ ഹാൻഡ് ഹെൽഡ് മൊബൈൽ ഫോണോ കമ്യൂണിക്കേഷൻ ഡിവൈസുകളോ ഉപയോഗിക്കുന്നത് നിരോധിച്ചു. ഇവിടെ ഹാൻഡ് ഹെൽഡ് മൊബൈൽ ഫോൺ എന്നാണ് പറഞ്ഞിരിക്കുന്നത് എന്നത് ശ്രദ്ധിക്കുക. (The driver shall not use any hand held mobile phone or other communication device എന്നാണ് വാക്കുകൾ). ഇതാണ് മൊബൈൽ ഫോണിനെയും മറ്റ് കമ്യൂണിക്കേഷൻ ഡിവൈസുകളെയും ഹാൻഡ് ഹെൽഡ് ആയും ഹാൻഡ് ഹെൽഡ് അല്ലാത്തതായും വേർതിരിക്കുന്ന ആദ്യത്തെ ചട്ടം. [ഇതും നിലവിലുള്ള നിയമം അനുസരിച്ചുള്ള ചട്ടമാണ് എന്നത് ശ്രദ്ധിക്കുക. ഈ ചട്ടവും നിയമത്തിന് മുകളിലല്ല.]
8. 2019-ൽ THE MOTOR VEHICLES (AMENDMENT) ACT, 2019 ലൂടെ ഇന്ത്യൻ പാർലമെന്റ് 1988-ലെ മോട്ടോർ വെഹിക്കിൾ ആക്റ്റ് ഭേദഗതി ചെയ്തു. 2017-ലെ മോട്ടോർ വെഹിക്കിൾ (ഡ്രൈവിങ്) റൂൾസിലൂടെ ഗവണ്മെന്റ് കൊണ്ടുവന്ന ഹാൻഡ് ഹെൽഡ് ഡിവൈസ്/ഹാൻഡ് ഹെൽഡ് അല്ലാത്ത ഡിവൈസ് എന്ന വ്യത്യാസം ഈ നിയമഭേദഗതിയിലൂടെ നിയമമായി മാറി. മോട്ടോർ വെഹിക്കിൾ നിയമത്തിലെ സെക്ഷൻ 184 ഭേദഗതി ചെയ്ത് പൊതുജനങ്ങൾക്ക് അപകടകരമായ പ്രവൃത്തികളും മറ്റും കൂടുതൽ വ്യക്തമാക്കി. നിയമത്തിലെ വിശദീകരണം (സി) അനുസരിച്ച് ഡ്രൈവ് ചെയ്യുമ്പോൾ ഹാൻഡ് ഹെൽഡ് കമ്യൂണിക്കേഷൻസ് ഉപകരണം ഉപയോഗിക്കുന്നത് പൊതുജനങ്ങൾക്ക് അപകടകരമായ പ്രവൃത്തിയായി കണക്കാക്കേണ്ടതാണ് എന്ന് നിഷ്കർഷിച്ചിട്ടുണ്ട്. മോട്ടൊർ വെഹിക്കിൾ നിയമത്തിലെ സെക്ഷൻ 184 (സി) പ്രകാരം ഹാൻഡ് ഹെൽഡ് ഡിവൈസ് ഉപയോഗിക്കുക എന്ന കുറ്റകൃത്യത്തിന് ശിക്ഷ കൊടുക്കുന്നത് സംബന്ധിച്ച് മോട്ടോർ വെഹിക്കിൾ നിയമത്തിലെ സെക്ഷൻ 200-ലും പരാമർശമുണ്ട്.
9. മോട്ടോർ വെഹിക്കിൾ നിയമം 2019-ൽ ഭേദഗതി ചെയ്ത് ഹാൻഡ് ഹെൽഡ് ഡിവൈസുകൾക്ക് മാത്രമായി ശിക്ഷ പരിമിതപ്പെടുത്തിയതോടെ അതിന് മുൻപ് നിലവിലുണ്ടായിരുന്ന 1988-ലെ മോട്ടോർ വെഹിക്കിൾ നിയമം അനുസരിച്ചുണ്ടാക്കിയ 1989-ലെ മോട്ടോർ വെഹിക്കിൾ ചട്ടത്തിലെ 21 (25) ൽ മൊബൈൽ ഫോണുകളെ ഹാൻഡ് ഹെൽഡ് എന്നോ ഹാൻഡ്സ് ഫ്രീ എന്നോ വേർതിരിക്കാതെ എല്ലാം ഒരേ തരത്തിൽ കാണുന്ന സമീപനം അസാധുവാകേണ്ടതാണ്. 21 (6) ചട്ടത്തിലെ ശ്രദ്ധ തെറ്റുന്ന തരം പ്രവൃത്തിയാണ് ഡ്രൈവിങ്ങിനിടെയുള്ള മൊബൈൽ ഫോണിന്റെ ഉപയോഗം എന്ന സമീപനവും അസാധുവാകേണ്ടതാണ്.

ഒന്നുകൂടി പറയാം. ഇപ്പോൾ ഇന്ത്യൻ പാർലമെന്റ് പാസാക്കി പ്രസിഡന്റ് ഒപ്പിട്ട നിയമം അനുസരിച്ച് ഹാൻഡ് ഹെൽഡ് മൊബൈൽ ഫോണുകൾ ഉപയോഗിക്കുന്നത് മാത്രമാണ് കുറ്റകരം. ഡ്രൈവ് ചെയ്യുന്നതിനിടെ ഹാൻഡ് ഫ്രീ മൊബൈൽ ഫോണുകൾ ഉപയോഗിക്കുന്നത് ഇന്ത്യൻ പാർലമെന്റ് പാസാക്കി പ്രസിഡന്റ് ഒപ്പിട്ട നിയമം അനുസരിച്ച് കുറ്റകരമല്ല.

ഇപ്പോൾ നിലവിലുള്ള നിയമത്തിന് മുൻപ് ഉദ്യോഗസ്ഥന്മാർ എഴുതി ഗസറ്റിലൂടെ വിജ്ഞാപനം ചെയ്ത ചട്ടങ്ങളിൽ മാത്രമാണ് ഹാൻഡ് ഹെൽഡ് എന്നോ ഹാൻഡ്സ് ഫ്രീ എന്നോ വേർതിരിവില്ലാതെ ഡ്രൈവിങ്ങിനിടെ മൊബൈൽ ഫോൺ ഉപയോഗിച്ചാൽ ശിക്ഷിക്കാമെന്ന് ഉള്ളത്. ഇത് നിയമത്തിന് മുകളിലല്ല!!
നിയമാനുസൃതമല്ലാത്ത ഈ ചട്ടങ്ങളനുസരിച്ച് ഒരു കോടതിയും ഹാൻഡ്ഫ്രീ മൊബൈൽ ഫോൺ ഉപയോഗിച്ചുകൊണ്ട് ഡ്രൈവ് ചെയ്യുന്നവരെ ശിക്ഷിക്കും എന്ന് എന്റെ എളിയ ബുദ്ധിയിൽ തോന്നുന്നില്ല.

ഇതാണ് എന്റെ അഭിപ്രായം. ഇന്ത്യൻ ഭരണഘടന തരുന്ന അവകാശം എന്ന നിലയിൽ ഈ അഭിപ്രായം പറയുന്നു. ഈ അഭിപ്രായമൊന്നും “വ്യക്തമായി“ പറയാൻ തക്ക അധികാരിയല്ല ഞാൻ എന്ന് എനിക്ക് ഉത്തമബോധ്യമുണ്ട്!!!
വ്യക്തമാവണമെങ്കിൽ ഒരു വിശദീകരണവും കൂടാതെ പോലീസുദ്യോഗസ്ഥർ പറയണം എന്നാണ് മാധ്യമങ്ങളിൽ നിന്ന് ഞാൻ മനസ്സിലാക്കുന്നത്.